Lev 8 | NdeIBE | STEP | UJehova wathi kuMosi,

Leviticus 8

Ukugcotshwa kuka-Aroni lamadodana akhe

1 UJehova wathi kuMosi, 2 “Letha u-Aroni lamadodana akhe, lezambatho zabo, lamafutha okugcoba, inkunzi yomnikelo wesono, inqama ezimbili lesitsha sokuthwalela isinkwa esibhakwa kungelamvubelo,

3 ubusubuthanisa ibandla lonke esangweni leThente lokuHlanganela.” 4 UMosi wenza njengokulaya kuka Jehova, ibandla lonke laselibuthana esangweni leThente lokuHlanganela.

5 UMosi wakhuluma ebandleni wathi, “Lokhu yikho uJehova alaye ukuthi kwenziwe.” 6 UMosi waseletha u-Aroni lamadodana akhe phambili wabagezisa ngamanzi. 7 Wagqokisa u-Aroni ibhatshi wasemgaxa ibanti, wamgqokisa isambatho semahlombe waphinda wabophela isambatho semahlombe ngozwezwe lwaso olwelukwe ngobungcitshi; laselibotshelwa kuye.

8 Wamgqokisa isambatho sesifuba wasebeka inkatho ye-Urimi leThumimi esambathweni leso. 9 Wamthwalisa iqhiye ekhanda lakhe kwathi phezu kweqhiye, ngaphambili wabeka icence legolide, umqhele ongcwele, njengalokhu uJehova ayelaye uMosi ukuthi akwenze.

10 UMosi wathatha amafutha okugcobela isikhundla wagcoba ithabanikele lakho konke okwakukilo, wakwahlukanisela uJehova.

11 Wachela amanye amafutha e-alithareni lezitsha zalo zonke, lomkolo walo, lalapho obekwa khona, ukuze akwahlukanisele uJehova. 12 Wathela amanye amafutha ekhanda lika-Aroni wamgcoba ukuba amahlukanisele uJehova. 13 Wasesondeza amadodana ka-Aroni phambili wawagqokisa amabhatshi wawabopha ngamabhanti wawabopha emakhanda awo ngentambo njengalokho uJehova walaya uMosi.

14 Waseletha inkunzi yomnikelo wesono, u-Aroni lamadodana akhe babeka izandla zabo ekhanda layo. 15 UMosi wahlaba inkunzi wasethatha elinye igazi, waselininda ngomunwe empondweni ze-alithare ukuthi lihlambuluke. Wathululela igazi elalisele phansi kwe-alithare walahlukanisela uJehova ukwenza ukubuyisana ngalo. 16 UMosi wathatha idanga elembese ezangaphakathi, isibindi, lezinso zombili lamahwahwa azo wasekutshisela e-alithareni.

17 Kodwa inkunzi lesikhumba sayo lenyama yayo lomswane wayo wakutshisela phandle kwezihonqo njengalokho uJehova amlaya khona.

18 Waseletha inqama ukuze ibe ngumnikelo wokutshiswa, u-Aroni lamadodana akhe babeka izandla zabo ekhanda lenqama. 19 UMosi wayibulala inqama wasechela igazi layo emaceleni wonke e-alithare. 20 Wasika inqama yaba ngamaqatha wasetshisa inhloko, amaqatha lamahwahwa. 21 Wagezisa ezangaphakathi lemilenze ngamanzi wasetshisa isidumbu sonke senqama e-alithareni njengomnikelo wokutshiswa, uqhatshi olumnandi, umnikelo owenziwa kuJehova ngomlilo njengoba uJehova walaya uMosi.

22 Wasesethula eyinye inqama, yokusetshenziswa begcotshwa esikhundleni u-Aroni lamadodana akhe babeka izandla ekhanda layo. 23 UMosi wahlaba inqama wathatha elinye igazi layo waselininda endlebeni yokunene kuka-Aroni lesithupheni sesandla sakhe sokudla lasezwaneni elikhulu lonyawo lwakhe lwesokudla. 24 UMosi waletha amadodana ka-Aroni phambili waseninda elinye igazi endlebeni zakwesokudla lasezithupheni zezandla zabo zakwesokudla. Wasechela igazi emaceleni wonke e-alithareni. 25 Wathatha amahwahwa, umsila ononileyo ledanga elembese ezangaphakathi, isibindi, izinso zombili lamahwahwa azo kanye lomlenze wakwesokudla. 26 Esitsheni sesinkwa esibhakwa kungela mvubelo, esasiphambi kukaJehova, wathatha ucezu lwesinkwa laleso esasenziwe ngamafutha lekhekhana eliyisicecedu wasebeka amahwahwa la emlenzeni wesokudla. 27 Wabeka konke lokhu ezandleni zika-Aroni lamadodana akhe wakuzunguza phambi kukaJehova kwaba ngumnikelo wokuzunguza. 28 UMosi wakuthatha ezandleni zabo wasekutshisela e-alithareni phezu komnikelo wokutshiswa kwaba ngumnikelo wokugcotshwa olephunga elimnandi, umnikelo owenzelwa uJehova ngomlilo. 29 Wasethatha isifuba – isabelo sikaMosi enqameni yokugcotshwa – wasizunguza phambi kukaJehova njengomnikelo wokuzunguza njengokulaywa kukaMosi nguJehova. 30 UMosi wasethatha amanye amafutha okugcobela isikhundla lelinye igazi elisuka e-alithareni wasechela u-Aroni lezambatho zakhe kanye leyamadodana akhe lezambatho zawo. Ngalokho wangcwelisa u-Aroni lezambatho zakhe, lamadodana akhe lezambatho zawo.

31 UMosi wasesithi ku-Aroni lamadodana akhe, “Phekelani inyama entubeni yeThente lokuHlanganela beseliyidlela khona lesinkwa esivela esitsheni seminikelo yokugcotshwa njengoba ngalaya ngisithi ‘u-Aroni lamadodana akhe yibo abazakudla.’ 32 Tshisani inyama lesinkwa okuzasala. 33 Lingasuki esangweni leThente lokuHlanganela okwezinsuku eziyisikhombisa, kuze kuphele amalanga okugcotshwa kwenu, ngoba ukugcotshwa kwenu kuzathatha izinsuku eziyisikhombisa.

34 Lokho okwenziwa namhla kwalaywa nguJehova ukwenzela ukuthi lilungiselwe indlela yokubuyisana. 35 Kumele lihlale esangweni leThente lokuHlanganela emini lebusuku okwezinsuku eziyisikhombisa lisenza lokho okuyabe kufunwa nguJehova ukuze lingafi, ngoba yikho engalaywa ngakho.”

36 Ngakho u-Aroni lamadodana akhe benza konke uJehova ayebalaye khona ngoMosi.